Кина планира да ги намали барањата за карантин за патниците од странство, објави денеска Ројтерс. Агенцијата наведува дека овие планови претставуваат продолжување на олабавувањето на исклучително строгите мерки против вирусот „Ковид19“ во Кина, познат и како „нула ковид“.

Кина почна да ги олабавува своите строги политики за нулта ковид и заклучување кон крајот на ноември, под притисок на уличните протести во Пекинг и некои други кинески градови.

Здравствените експерти се согласуваат во нивните проценки дека Кина ќе очекува бран нови инфекции и смртни случаи од корона вирусот во наредните месеци, пред се кај постарата популација.

На почетокот на овој месец, Светската здравствена организација соопшти дека е загрижена поради порастот на бројот на заразени со Ковид-19 во Кина и повика на напори за вакцинирање на ризичните групи на население.

Ројтерс претходно објави дека германската влада сака можноста за вакцинација со Фајзер на германските граѓани во Кина да се прошири и на другите странци кои живеат во земјата, како и на самите кинески граѓани.

Од почетокот на избувнувањето на корона вирусот, Пекинг инсистира кинеските граѓани да се вакцинираат исклучиво со Синовак и други вакцини произведени во Кина.