Кина размислува да испрати беспилотни летала и муниција во Русија, соопштија американските власти, повикувајќи се на разузнавачки информации. Се чини дека Пекинг сè уште не донел конечна одлука и нема докази дека било испратено оружје, велат тие. Сепак, преговорите меѓу Русија и Кина за цената и оружјето се во тек, пренесува CNN. Оваа вест доаѓа во време кога руската армија забрзано ги исцрпува резервите на муниција.

Русија постојано бараше беспилотни летала и муниција од Кина, велат изворите, а кинеското раководство во последните месеци активно дебатира дали да испрати или не клучна помош за Русија.

Американските разузнавачи веруваат дека Кина во моментов ја фаворизира опцијата да и помогне на Русија и покрај тоа што вчера повика на мировни преговори и ги повика завојуваните страни да ги прекинат нападите врз цивилите. Американските извори велат дека снабдувањето со беспилотни летала и муниција најверојатно ќе биде за мало оружје, како што се пиштоли, наместо за поголема артилерија. „Кина има капацитет да го промени текот на војната“, вели висок претставник на американската администрација.

Истовремено, Францускиот претседател Емануел го повика Пекинг да „помогне да се изврши притисок врз Русија“ за прекин на војната во Украина.

Говорејќи еден ден откако Кина повика на итни мировни преговори со објавување на својот план за ставање крај на војната во Украина, Макрон рече дека мирот е можен само доколку „руската агресија биде запрена, силите се повлечат и се почитува територијалниот суверенитет на Украина и нејзиниот народ“.

Тој најави посета на Пекинг на почетокот на април.