Официјалниот претставник на борбената команда на Источната зона на Народноослободителната војска на Кина (ПЛА), Ши Ји, најави почеток на воените вежби, пренесува „РИА Новости“. Кинеската војска го најави овој чекор откако американскиот авион со Ненси Пелоси, претседателката на Претставничкиот дом на САД, слета во Тајван.

„Вечерта на 2 август, Источната борбена команда на Народноослободителната војска започна серија заеднички воени операции околу островот Тајван, како и заеднички воздушни и поморски вежби во морето и воздушниот простор на север, југозапад и југоисток од Тајван. “, рече Ши Ји.

Како што пренесува Телеграм каналот „Military Observer“, под изговор за воени вежби, Народноослободителната армија на Кина целосно ќе го опколи островот Тајван. Воспоставена е блокада. Претходно Кина најави воени вежби во шест поморски области околу Тајван.

„Кинеската Народноослободителна армија рече дека вежбите би можеле да започнат уште во вторник, оставајќи ја отворена можноста за воени операции околу Тајван додека Пелоси е во посета. Тие операции вклучуваат гаѓање од долг дострел во Тајванскиот теснец и „редовни пробни тестирања во источните води“ на Тајван“, соопшти војската, пренесува Блумберг.