Северна Кореја соопшти дека успешно тестирала нова, хиперсонична ракета Хвасонг 8.

Државните медиуми објавија дека овој проектил е едно од петте најважни нови оружја, чиј развој е предвиден во новиот петгодишен воен план.

Севернокорејските власти овој проектил го нарекуваат „стратешко оружје“, и тој термин често значи дека постојат одредени нуклеарни карактеристики.

Тестирањето на оваа ракета е уште еден показател дека Пјонгјанг продолжува да развива оружје и покрај строгите санкции.

„Развојот на овој вооружен систем ја зголемува моќта на самоодбрана на целата нација во секоја смисла“, се наведува во извештајот на државната новинска агенција КЦНА.

Ова беше трет тест за ракета во последниот месец.

Северна Кореја веќе покажа дека има нова крстосувачка ракета, како и нов систем за балистички ракети.

Што е хиперсоничен проектил?

Хиперсоничните проектили се многу побрзи и поагилни од стандардните, што им отежнува на одбранбените системи да ги пресретнат.

Агенцијата КЦНА објави дека за време на тестирањето било утврдено дека „проектилот е стабилен и дека има успешна контрола за навигација“.

Анкит Панда од фондацијата Карнеги за мир рече дека во овој момент е тешко да се утврди точноста на таков проектил.

Тој додаде дека „може да претставува значително различен предизвик за одбранбените системи во споредба со стандардните балистички ракети“.

Во ова ново оружје, Северна Кореја за прв пат употреби ампула со ракетно гориво.

Ова значи дека проектилот е подготвен да биде лансиран веднаш.

Нема потреба да се истура гориво на земја и лансирањето е многу побрзо.

Побрзото лансирање исто така значи дека е многу потешко за другите земји да извршат превентивен напад.

На состанокот во јануари, севернокорејскиот лидер Ким Јонг Ун рече дека научниците завршиле со испитување на можноста за развој на хиперсонични боеви глави со боеви глави.

Ова беше нивниот прв тест.

„Не е големо изненадување, со оглед на она што Ким го кажа во јануари“, рече Панда.

„Сепак, најновиот тест е потсетник дека Ким сѐ уште има амбиции да развие ракетно оружје.

Јужнокорејската војска соопшти дека верува оти хиперсоничната ракета сѐ уште е во рана фаза на развој и дека ќе треба време да биде подготвена за употреба во борба.

Се додава дека заедно со американската армија, во овој момент, Јужна Кореја може да ја забележи и пресретне таа ракета.

Што е познато за програмата за развој на оружје на Северна Кореја?

Најновите тестови, трети во последниот месец, покажуваат дека државата брза да продолжи со програмата за развој на оружје.

Кратко по вчерашниот тест, севернокорејскиот пратеник Ким Сонг рече дека оваа земја има право да развива оружје.

Говорејќи на Генералното собрание на Обединетите нации во Њујорк, тој рече дека Северна Кореја „го зајакнува одбранбениот систем со цел да се зачува мирот и стабилноста“.

Северна Кореја постојано го обвинува својот јужен сосед за двојни стандарди кога станува збор за воени активности.

Јужна Кореја неодамна ја тестираше првата балистичка ракета лансирана од подморница.

Потоа, Сеул објави дека се разликува од „провокациите“ на севернокорејската страна.

САД побараа Северна Кореја да се откаже од нуклеарното оружје, а односите на Пјонгјанг со администрацијата на претседателот eо Бајден досега беа полни со тензии.

Исто така, постојат тензии меѓу Јапонија и Северна Кореја, а коренот лежи во 35-годишната јапонска колонизација на Кореја, напорите на Пјонгјанг да развие нуклеарна програма и киднапирањата на јапонски граѓани.

И покрај ова, Пјонгјанг се чини дека е решен да докаже дека ќе продолжи да развива нови вооружени системи.

Минатиот месец, Агенцијата за атомска енергија на ОН соопшти дека се чини дека Северна Кореја го рестартирала реакторот што може да произведе плутониум за нуклеарно оружје, нарекувајќи го „длабоко загрижувачки“.

извор: бибиси