Северна Кореја го укина мораториумот за нуклеарно и ракетно тестирање со долг дострел уште од првиот ден од Новата година, што беше на сила за време на разговорите со САД, но американскиот претседател Доналд Трамп сепак смета дека Ким Јонг Ун е „човек од збор“.

„Тој потпиша договор, тој потпиша договор за денуклеаризација. Тоа се случи во Сингапур. Мислам дека тој е човек од збор, па ќе видиме што ќе се случи“, рече Трамп пред новинарите во неговиот клуб„ Мар-а-Лаго “во Флорида, пренесува Ројтерс.

Севернокорејскиот лидер на првиот ден од Нова 2020 објави дека неговата земја ќе продолжи да ја развива својата нуклеарна програма и најави скоро лансирање на „ново стратешко оружје“.