„Ракетен напад врз Харков, погодена висококатница“

Руските сили извршија ракетен напад врз центарот на Харков и беше погодена повеќекатница, јавија утрово украинските медиуми.

Спасувачите се на терен, а од урнатините е спасена постара жена. Укринформ јавува дека во градот се слушнале три експлозии.

Засега нема информации за загинати или повредени, наведува Униан.

Киев подготвува контранапад на Херсон и повикува на евакуација

Украинската вицепремиерка Ирина Верешчук ги повика цивилите во областа Херсон, јужна Украина, под контрола на Русија, веднаш да се евакуираат додека украинските вооружени сили подготвуваат контранапад.

„Јасно е дека ќе има борби и гранатирање. Затоа ги повикуваме луѓето веднаш да се евакуираат“, објави Верешчук на националната телевизија во неделата и нагласи дека не може точно да каже кога ќе се случи украинската контраофанзива.

Таа предупреди дека постојат сигурни сознанија дека жените и децата не треба да бидат во Херсон за да не се користат „како жив штит“, пренесува Ројтерс.