Катарските воздухопловни сили тврдат дека во понеделник собориле два авиона што доаѓале од правец на Иран, објави Министерството за одбрана во Доха.

Министерството за одбрана на Катар издаде официјално соопштение во кое детално се опишува она што го тврдат како успешна одбранбена операција, нагласувајќи дека нападите биле насочени кон повеќе локации во земјата.

Според официјалните изјави од Доха, катарските вооружени сили успешно неутрализирале повеќе закани од воздух.

Во координирана акција на катарските воздухопловни и поморски сили, како што е наведено во соопштението, биле пресретнати и уништени два борбени авиони (Сухој СУ-24) што доаѓале од правец на Иран. Тие наведуваат дека биле соборени и седум балистички ракети за кои се тврди дека биле запрени од противвоздушни одбранбени системи, како и пет беспилотни летала (дронови) кои биле заеднички пресретнати од катарските воздухопловни и поморски сили.

„Катарските воздухопловни сили успешно соборија два авиони (Су-24) кои доаѓаа од Исламската Република Иран. Тие, исто така, успешно пресретнаа седум балистички ракети преку противвоздушна одбрана и пет беспилотни летала кои денес погодија неколку области во земјата“, се вели во соопштението на катарското министерство.

Во своето обраќање до јавноста, Министерството за одбрана не даде дополнителни детали за судбината на пилотите на соборените бомбардери Сухој СУ-24, а во моментов не е познато дали ја преживеале несреќата. Сè уште нема независна потврда за овој инцидент.