Според Федерацијата на американските научници, Русија има вкупно 5.977 нуклеарни боеви глави - најмногу во светот. За споредба, САД имаат 5.428 боеви глави, Франција 290, а Велика Британија 225 боеви глави. Русија и САД поседуваат околу 90% од сите нуклеарни боеви глави, пренесува Index.hr.

Bulletin of Atomic Scientists наведува дека рускиот арсенал содржи 4.447 боеви глави, од кои 1.588 се распоредени на базите за балистички ракети и тешки бомбардери. Има дополнителни 977 стратешки боеви глави, заедно со 1.912 нестратешки боеви глави, кои се чуваат во резерва.

Сепак, експертите рекоа дека точниот број на боеви глави и оружје не е познат поради тајноста на безбедносните стратегии.

Каква закана претставува тоа оружје за Украина и светот?

Интерконтиненталните балистички ракети (ICBM), кои ги поседува Русија, имаат способност да стигнат и да ги уништат големите светски градови како Лондон или Вашингтон. ICBM може да достигне максимална брзина околу 10 минути по лансирањето, што значи дека проектилот истрелан од Русија би можел да стигне до Велика Британија за само 20 минути.

Во март, Путин предизвика загриженост ширум светот откако ги стави своите нуклеарни сили во состојба на готовност. Во тоа време, експертот за одбрана Ричард Баронс изјави за Sky News:

„Путин почна да инсинуира дека нуклеарното оружје може да се користи на глобално ниво. Ова значи интерконтинентални балистички ракети кои можат да стигнат и до САД и до Европа. Боевата глава има моќност од 300 до 800 килотони ТНТ. Околу 300 килотони се доволни за уништување на Вашингтон или Лондон или Париз. Влоговите околу Украина сега станаа глобални. Во суштина, со отворањето на прашањето за нуклеарното оружје, остатокот од западната хемисфера сега е на истото поле за игра како Украина“.

Каква би била руската процедура за употреба на нуклеарно оружје?

Претседателот, секретарот за одбрана или началникот на Генералштабот мора да дадат дозвола преку она што се нарекува Cheget Nuclear Coelcase. Нуклеарната доктрина на Русија дозволува употреба на тактичко нуклеарно оружје - ограничена нуклеарна експлозија - во конвенционален конфликт. Стратешкото нуклеарно оружје може да погоди цели многу подалеку, како што се оние во САД. Тактичко нуклеарно оружје е термин кој се користи за ракети кои се распоредени на бојното поле, како што е бојното поле во Украина.