Хаосот продолжува во Авганистан, илјадници луѓе очајно се обидуваат да ја напуштат земјата. Тој број се додава на 2,2 милиони авганистански бегалци што живеат во соседните земји, додека 3,5 милиони луѓе живеат без покрив над главата на самата граница како резултат на континуираниот конфликт и политичката нестабилност.

„Огромното мнозинство Авганистанци не можат да ја напуштат земјата преку официјални премини“, изјави во петокот портпаролот на Високиот комесаријат за бегалци на Обединетите нации (УНХЦР), додека Талибанците ги контролираа сите клучни гранични премини со соседните земји. Според извештаите, дозволен е само премин на трговци или оние кои имаат валидни патни исправи.

Сепак, некои бегалци успеаја да најдат начин да избегаат од земјата. Неколку часа по опсадата на Кабул, десетици илјади Авганистанци, наводно, преминале во Пакистан, додека околу 1.500 Авганистанци влегле во Узбекистан и живеат во шатори во близина на границата. Во Кабул, илјадници луѓе се упатуваат кон аеродромот, кој е единствениот пат за бегство.

Кои беа дестинациите на авганистанските бегалци во 2020 година?

Минатата година, според „Катимерини“, Пакистан и Иран забележаа огромен број на бегалци и баратели на азил од Авганистан. Според податоците на УНХЦР, во 2020 година, Пакистан прими околу 1,5 милиони авганистански бегалци, додека Иран прими 780.000. Повеќе од 180.000 Авганистанци се засолниле во Германија, додека Турција била дестинација за речиси 130.000 бегалци.

Ако се испита само бројот на баратели на азил (т.е. оние кои аплицирале во друга земја, но се уште не биле одобрени), Турција, Германија и Грција се на врвот на ранг -листата, со околу 125.000, 33.000 и 20.000 соодветно.

Иран

Иран формираше бегалски кампови во три провинции што се граничат со Авганистан. Сепак, високи владини претставници рекоа дека Авганистанците кои ќе преминат во Иран „ќе бидат вратени во татковина штом ќе се подобрат условите во земјата“. Авганистанските бегалци во Иран имаат пристап до здравствена заштита и образование. Според ОН, земјата веќе е домаќин на речиси 3,5 милиони Авганистанци.

Пакистан

Премиерот Имран Кан во јуни рече дека неговата земја ќе ја затвори границата со Авганистан доколку Талибанците дојдат на власт. Илјадници Авганистанци, наводно, преминале во Пакистан и барем еден граничен премин е отворен.

Таџикистан

Бројките не се јасни, но се проценува дека неколку стотини Авганистанци, вклучувајќи војници на авганистанската национална армија, во последните денови преминаа во Таџикистан. Во јули, земјата соопшти дека се подготвува да прими до 100.000 бегалци од Авганистан.

Узбекистан

Се тврди дека околу 1.500 Авганистанци преминале во Узбекистан.

Обединето Кралство

Обединетото Кралство соопшти дека планира да прифати 20.000 авганистански бегалци на долг рок. Програмата на британската влада има за цел да дозволи 5.000 Авганистанци да се населат во земјата во првата година. Програмата има за цел да ги поддржи жените и децата, како и верските и другите малцинства загрозени од Талибанците.

САД

Иако не е објавен точниот број бегалци што земјата ќе ги прими, претседателот Џо Бајден одобри фонд од 500 милиони долари за итни потреби на бегалци и имигранти, вклучително и специјални кандидати за виза.

Канада

Канада соопшти дека ќе биде домаќин на 20.000 Авганистанци, фокусирајќи се првенствено на оние кои се изложени на ризик од Талибанците, вклучително и владини претставници и жени.

Австралија

Се очекува Австралија да обезбеди 3.000 места за Авганистанците во програмата за хуманитарна виза. Сепак, позициите ќе доаѓаат од постојната програма и нема да има зголемување на вкупниот број.

Европска унија

Официјални претставници во многу земји на ЕУ нагласуваат дека сакаат да избегнат повторување на имигрантската криза во 2015 година, што придонесе за подемот на популизмот.

Германија

Германија соопшти дека ќе прифати авганистански бегалци, но се уште не го утврди точниот број. Канцеларката Ангела Меркел рече дека владата се обидува да обезбеди бегалците „да имаат безбеден престој во соседните земји на Авганистан“.

Франција

Емануел Макрон истакна дека Европа мора да биде „заштитена од значителни бранови илегални имигранти“ од Авганистан. Тој, исто така, нагласи дека Франција „ќе ги заштити оние кои се најмногу изложени на ризик“, но нагласи дека „Европа не може да ги поднесе последиците од ситуацијата во Авганистан сама“.

Австрија

Австрија ја отфрли можноста за сместување авганистански бегалци. Министерот за внатрешни работи ја нагласи потребата од продолжување на депортацијата на авганистанските баратели на азил кои не ги исполнуваат критериумите и ја нагласи потребата од формирање „центри за депортација“ во соседните земји на Авганистан.

Швајцарија

Швајцарија изјави дека нема да прифати големи групи бегалци кои пристигнуваат директно од Авганистан.

Турција

Претседателот Реџеп Таип Ердоган изјави дека неговата влада ќе работи со Пакистан за да ја стабилизира ситуацијата во Авганистан, како и да спречи нов бран бегалци кон Турција. Владата ја забрзува изградбата на ѕид на границата со Иран.

Северна Македонија, Албанија, Косово

Северна Македонија и Албанија привремено ќе примат 450, односно 300 бегалци, на барање на Соединетите држави. Бегалците ќе останат додека не се подмират документите за американската виза. Косово, исто така, планира да обезбеди привремено засолниште за бегалците кои се упатуваат кон Соединетите држави.

Уганда

Уганда се согласи да прифати 2.000 авганистански бегалци.