Исчезнувањето на Шенген зоната носи ризици за постоењето на Европската унија, смета претседателот на Еврокомисијата (ЕК), Жан-Клод Јункер, пренесуваат светските медиуми цитирајќи му ја изјавата на пленарната седница на Европскиот парламент во Стразбур.

„Отпрвин земјите од ЕУ воведуваат контрола на границите, а потоа може да се прашуваат, зошто ни е потребна единствена валута, ако нема слобода на движење - тоа го става Шенгенот на границата на опстанок“, изјавил претседателот на Европската комисија.

Во моментов Норвешка, Шведска, Данска, Германија, Франција, Малта и Австрија имаат воведено гранична контрола со цел премин на нелегалната миграција.

Виена го најави враќањето на оваа практика во саботата, на 16 јануари. Сојузниот канцелар на Австрија, Вернер Фајман ја објасни потребата од донесување на вакви мерки со неуспех на работата на Унијата за обезбедување на безбедноста на надворешните граници.

„Во таков случај секоја земја мора да ги контролира своите граници“, рече тој.

Во есента минатата година, поради прилив на бегалци, привремено беа запрени возовите меѓу Германија и Австрија. Во Унгарија, исто се блокираше меѓународното движење на возовите.

Во 2015 година во ЕУ се појави криза поради приливот на бегалци. Најмногу мигранти пристигнуваат од Сирија, каде од 2011 година има граѓанска војна. Оттогаш, повеќе од 507 000 Сиријци се обратиле со барање за азил во европските земји. Според податоците на ОН во 2016 година миграцискиот бран во ЕУ може да се зголеми двојно, а според податоците на ЕУ - тројно.

Според Шенген конвенцијата за отворени граници земјите учеснички во договорот имаат право на привремено враќање на пасошката контрола на внатрешните граници, ако тоа е потребно за одржување на безбедноста и јавниот ред.

Шенгенскиот договор за поедноставување на пасошко-визната контрола е потпишан на 14 јуни 1985 година и првично се однесуваше за пет земји - Белгија, Холандија, Луксембург, Франција и Германија. Сега во зоната на дејствување на Шенгенскиот договор влегуваат 26 европски земји.