Палестинската власт тврди дека во Газа загинаа повеќе од 7.000 луѓе, а речиси половина од нив се деца.

Министерството за здравство во Појасот Газа, каде управува исламистичкиот Хамас, oбјави дека од почетокот на израелското бомбардирање на палестинската енклава на 7 октомври загинале 7.028 лица, меѓу кои 2.913 деца. Убиени се 1.709 жени, а ранети се 18.484 луѓе, пренесе агенцијата Франс прес.

Оваа петта израелска војна против Хамас е најсмртоносната по повлекувањето на Израел од Газа во 2005 година, две години пред Хамас да ја преземе власта насилно, поразувајќи ги силите лојални на поумерениот Фатах.

Во Израел од 7 октомври загинаа повеќе од 1.400 луѓе, најголем дел цивили. Повеќето од нив загинаа на првиот ден од нападот, кога стотици екстремисти на Хамас ја пробија граничната ограда и навлегоа во јужниот дел на израелската територија со поддршка на баражен ракетен оган. На израелска страна се ранети повеќе од 5.400 луѓе. Хамас тој ден зароби повеќе од 220 луѓе и ги однесе во Појасот Газа. Досега ослободи четири жени, меѓу кои и две Американки.

Израел врши „колективно казнување“ на Палестинците, обвинија девет арапски држави.

Обединетите Арапски Емирати, Јордан, Бахреин, Саудиска Арабија, Оман, Катар, Кувајт, Египет и Мароко го критикуваат Израел за убиство на цивили во Газа, тврдејќи дека „самоодбраната не го оправдува кршењето на меѓународното право и намерното непочитување на легитимните права на палестинскиот народ“.

Палестинскиот министер за надворешни работи Ријад ал Малики денеска изјави дека израелската офанзива на Појасот Газа е „војна за одмазда“ и повика на прекин на „едностраната агресија“.

foto EPA