Околу 100.000 руски ИТ експерти ја напуштиле својата татковина од почетокот на годината, што е приближно една десетина од сите тие експерти во Русија.

Ова го изјави рускиот министер за дигитален развој, комуникации и масовни медиуми Максут Шадаев, пренесува Индекс.

„Ако се анализираат двата брана на заминување на ИТ професионалците, до 10 отсто од вработените во ИТ компаниите ја напуштиле државата и не се вратиле. Многумина се вратиле, но околу 100 илјади информатичари се надвор од државата“, рече Шадаев.

Тој рече дека 80 отсто од тие луѓе сè уште се вработени во руски компании и се противи да им се забрани да работат на нивните сегашни локации во странство.

Првиот бран на иселување се случи набргу откако рускиот претседател Владимир Путин објави дека започнува воена операција во февруари, додека вториот следеше откако нареди делумна мобилизација на резервистите.

Европската унија не дозволи поголемиот дел од Русите во бегство да влезат на нејзина територија, па многумина побараа засолниште во соседните земји, поранешните советски републики.

Владата и парламентот расправаат за закон со кој на иселениците ќе им се забрани да продолжат да работат за руски компании. Тие веруваат дека тоа ќе ги спречи приговарачите на совеста да останат во странство. Во моментов се водат дебати за тоа кои сектори треба да бидат изземени од забраната.

Недостигот од руски ИТ експерти неодамна доведе до нивно официјално ослободување од воен рок за воена служба. Сепак, многу Руси не веруваат во ветувањата на Кремљ и претпочитаат да се држат настрана од својата татковина.