Истражување покажа дека гените на американскиот астронаут Скот Кели делумно се измениле откако поминал една година во вселената, потврди НАСА. Седум отсто од неговите гени не се вратиле во состојбата во која биле пред заминувањето на долгата мисија.

Скот и неговиот близнак брат Марк Кели, исто така астронаут, биле субјекти на истражување, чија цел била да се утврди што точно се случува со телото по една година помината во вселената.

Скот на Меѓународната вселенска станица останал од март 2015 година до март 2016 година, а за тоа време Марк бил на Земјата. Тоа била воедно и последната мисија на Скот, кој во текот на неговата кариера минал 520 дена во вселената.

Истражувачите го проучиле престојот на Скот во вселената со психолошките и физиолошките страни споредувајќи ги резултати со тие од неговиот брат, кој останал на Земјата.

Десет тима претставиле прелиминарни резултати минатата година, а оваа година тие се и потврдени. Поради престојот во вселената, гените на Скот претрпеле промени поради недостиг на кислород, чести воспалителни процеси и изненадувачки промени во внесувањето хранливи материи. Повеќето од промените се поправиле по враќањето на Земјата.