Во екот на санирање на последиците од серијата земјотреси кои минатата недела ја погодија Турција, оваа земја доби уште една застрашувачка вест. Сеизмолозите прогнозираат дека во наредниот период се очекува силен земјотрес во Истанбул. 

Тие посочиле дека градот веќе треба да почне да се подготвува за земјотрес кој може да се случи во секое време и да ги мобилизира сите расположливи ресурси за спасување животи и справување со економските последици.

Научниците кои зборуваа за Ал Џезира рекоа дека силен земјотрес најверојатно ќе го погоди најголемиот град во Турција, додека нацијата тагува за смртта на десетици илјади луѓе во југоисточниот дел на земјата пред повеќе од една недела.

Повеќе од 40.000 луѓе загинаа, а 80.000 беа повредени во земјотресите со јачина од 7,8 и 7,6 степени – со епицентар во градот Караманмараш – што се случија за неколку часа еден по друг на 6 февруари.

Двојните земјотреси погодија 10 провинции во Турција при што загинаа илјадници други во Сирија, а бројот на жртви се уште расте во двете земји. Многу жртви се уште се заробени под урнати згради низ регионот.

Масивната катастрофа го покрена прашањето за подготвеноста за земјотреси во Истанбул, главниот град на Турција за бизнис и туризам со околу 16 милиони луѓе. Научниците велат дека мегалополисот е под непосредна закана од силен земјотрес - можеби повеќекратен.