Германија усвои нови правила за мигрантите. 

Германскиот парламент денеска усвои нови построги правила на ЕУ за третман на барателите на азил и бегалците.

„Европската политика за азил е нефункционална со години, новите правила се голем чекор напред“, рече германскиот министер за внатрешни работи Александар Добриндт (Христијанско-социјална унија CSU) во дискусијата што му претходеше на гласањето во Бундестагот.

Реформата ја поздрави и помалиот партнер на канцеларот Фридрих Мерц во владата, Социјалдемократската партија на Германија (SPD). Претставникот на социјалдемократите Себастијан Фидлер рече дека оние кои заслужуваат заштита во ЕУ ќе продолжат да ја добиваат таа заштита.

Опозициските партии Алтернатива за Германија, Зелените и Левицата гласаа против хармонизацијата на правилата на ЕУ во германското законодавство, при што АфД рече дека законот не оди доволно далеку во спречувањето на нерегуларната миграција, а за Зелените и Левицата, новиот закон е премногу рестриктивен.

Една од главните точки на новиот закон за азил на ЕУ е спроведувањето на процесот на решавање на барањата за азил на надворешните граници на ЕУ за апликантите од оние земји чии граѓани имаат мали или никакви шанси да добијат азил.

Постапката би била забрзана и за оние баратели на азил кои влегле во ЕУ во друга земја-членка. За нив би се организирало сместување, каде што ќе мора да чекаат да се вратат во земјите каде што влегле во ЕУ.

Германија е еден од главните иницијатори на новите построги правила за азил на ЕУ.