Италијанските власти потврдија дека се идентификувани сите загинати патници во автобуската несреќа кај Венеција. Во автобусот имало и двајца Хрвати. Марко Баковиќ, 24-годишниот фудбалер од Сплит, кој е тешко повреден, моментално е на интензивното одделение во болницата Местре, додека во несреќата загинала неговата сопруга, 24-годишната Антонела. Девојката била бремена, а парот неодамна се венчал и бил на меден месец во Италија.

Префектот на Венеција, Микеле ди Бари, објави дека се идентификувани сите жртви во автобуската несреќа. Загинаа 9 Украинци, 4 Романци, 3 Германци, Италијанец (возачот на автобусот), Хрват, двајца Португалци и едно лице од Јужна Африка, јавува Скај.

Во оваа тешка сообраќајна несреќа најмалку 21 лице загина, а дваесетина се повредени откако автобусот со туристи излетал од надвозник во близина на Венеција и се запалил. Во автобусот имало 39 лица.

Автобусот излетал од патот и паднал во близина на железничка пруга во областа Местре, која е поврзана со Венеција со мост. Причината за несреќата се уште не е утврдена.

Официјални лица рекоа дека возилото паднало на далноводи и се запалило завчера околу 19:45 часот.