Германската канцеларка Ангела Меркел денеска беше примена на аудиенција од поглаварот на Римокатоличката црква Франциско.

На средбата во Ватикан, која траела околу 45 минути, Меркел и папата разговарале за прашања поврзани со верата, глобализацијата и улогата на Европа во светот.

По средбата Меркел изјави дека регулирањето на пазарите е главна цел, а функцијата на економијата е да им служи на луѓето.

Папата Франциско ја осуди „тиранијата“ на пазарите и побара финансиски реформи, проследени од поголема помош за сиромашните. Тој истакна дека „парите треба да им користат на луѓето, а не да ги раководат“.

- Разговорот со папата е признание за Германија, нагласи Меркел, додавајќи дека тој може да им се доближи на луѓето со прости и трогателни зборови.

Според германската канцеларка, папата Франциско јасно ставил до знаење дека Европа му е потребна на светот.