Унгарскиот премиер Виктор Орбан испрати писмо до шефот на Европскиот совет, Шарл Мишел, во кое се заканува дека ќе ја блокира целата помош на ЕУ за Украина, како и идниот пристап на земјата во заедничкиот блок, доколку лидерите на Унијата не ја преиспитаат стратегијата за поддршка на Киев.

Орбан вели дека е неопходно да се одржи „стратешка дискусија“ за актуелната политика кон Украина, вклучително и различни програми за помош, пред да се донесе каква било одлука за финансирање, отворање на преговорите за пристап во ЕУ или нови санкции кон Русија.

Во своето писмо, Орбан прашува дали ЕУ е сè уште подготвена да ја поддржи Украина со оглед на можноста дека САД, кои го обезбедија најголемиот дел од воената помош за Киев, можеби нема да можат да продолжат поради недостиг на договор во Конгресот. Исто така, тој предлага да се разгледа остварливоста на стратешките цели на ЕУ во Украина и да се процени дали оваа стратегија е одржлива без силна американска поддршка. Орбан наведува дека Европскиот совет е во позиција да донесе клучни одлуки за безбедносните гаранции, финансиската поддршка и процесот на проширување само доколку има консензус за идната европска стратегија кон Украина.

Писмото го зголемува влогот во долготрајниот ќор-сокак меѓу Будимпешта и Брисел, кој кулминираше со тоа што ЕУ задржа 13 милијарди евра средства за Унгарија поради загриженоста за владеење на правото во земјата.

Писмото на Орбан може да се смета и како притисок врз Европската комисија да ги ослободи овие средства. Без директно да се наведе, во писмото се сугерира дека Унгарија би можела да го искористи правото на вето и да ја блокира исплатата на планираните 50 милијарди евра помош за Украина, како и 500 милиони евра воена помош и отворање на формални пристапни преговори со Киев.

Заканата на Орбан доаѓа откако американскиот советник за национална безбедност Џејк Саливан предупреди дека „прозорецот“ за американската помош за Украина се затвора. Поради ваквиот став на Унгарија, некои земји од ЕУ веќе размислуваат за решение и испраќање финансиска помош за Украина преку билатерални аранжмани, наместо преку структурите на ЕУ, како што е Европскиот фонд за мир.

Сепак, тоа не би било можно кога станува збор за отворање формални пристапни преговори со Украина, бидејќи Унгарија мора да биде дел од тој процес.