Поранешната канцеларка на Германија Ангела Меркел добила повик од двајца Руси кои се преправале дека се поранешниот украински претседател Петро Порошенко.

Ја повикале Владимир Кузњецов и Алексеј Столјаров, познати како Вован и Лексус, кои се познати по тоа што ги повикуваат европските политичари при што се претставуваат како некој друг. Тие објавија дел од повикот на нивниот канал на Телеграм.

Кабинетот на Ангела Меркел денеска соопшти дека на 12 јануари поранешната германска канцеларка била повикана од некој кој тврди дека е Порошенко. Во разговорот учествувал германско-украински преведувач од јазичната служба на МНР. Вован и Лексус сакаа да разговараат со Меркел за развојот на ситуацијата во Украина и Белорусија. Но, Меркел се покажала претпазлива за време на разговорот, пишува ABC.

Меркел за време на повикот: Критикуваниот договор од Минск купи драгоцено време за Украина

Во соопштението од кабинетот на поранешната канцеларка се наведува дека по повикот Меркел го информирала министерството за впечатокот што го добила за јавувачот, но не појаснила за што се работи. На снимката објавена на Телеграм, Меркел може да се слушне како вели, како што и претходно јавно кажа дека „многу критикуваниот мировен договор од Минск купи драгоцено време за Украина“.

Меркел и поранешниот француски претседател Франсоа Оланд посредуваа во мировниот договор со Порошенко и рускиот претседател Владимир Путин во 2015 година. Меркел исто така ја критикуваше репресијата во Белорусија. Порошенко беше претседател на Украина од 2014 до 2019 година, а Меркел беше на чело на германската влада од 2005 до 2021 година.

Кузњецов и Столјаров веќе објавија разговори со европски политичари и се обидоа да ги посрамотат во разговорите. Тие ги повикаа францускиот претседател Емануел Макрон, полскиот претседател Анджеј Дуда и Борис Џонсон кога тој беше премиер на Велика Британија. Покрај тоа, тие ги повикаа и познатите личности како пејачот Елтон Џон и принцот Хари.