Украинскиот град Харков одлучи да ги отфрли барањата на проруските демонстранти кои ја зазедоа зградата на локалната администрација и бараа референдум за отцепување од Украина и за приклучување кон Русија. Според заменикот-гувернер на Харков Василиј Хом, барањата се одбиени бидејќи се „апсолутно неизводливи, невозможни и незаконити“. Тој додава дека Регионалниот совет на Харков воопшто нема овластување да донесе таква одлука за референдум, бидејќи тоа не е во согласност со украинскиот Закон за локална самоуправа. Демонстрантите и натаму се пред зградата на локалната администрација на Харков, која ја зазедоа пред два дена, а денеска од таму беа отстранети со полициска интервенција. Тие одново се обидуваат да ја заземат зградата, а притоа користат и петарди и други пиротехнички средства. При последниот обид запалиле една просторија во зградата, по што густ чад се раширил во целиот објект и ги истерал полицајците надвор. Ситуацијата дополнително се радикализира и во уште еден источен украински град Луганск, каде што според украинската Служба за државна безбедност, проруски демонстранти поставиле експлозив и држат 60 заложници. Ваквите информации ги демантираат проруските демонстранти кои под своја контрола и натаму ја држат зградата на локалната власт во Луганск. При нивниот обид да ја заземат зградата беа повредени најмалку девет лица.