Генералниот секретар на Обединетите нации Антонио Гутереш рече дека човештвото, соочено со глобалното затоплување и неговите последици, мора или да соработува или да исчезне.

- Човештвото има избор - да соработува или да исчезне. Тоа ќе биде или пакт за климатска солидарност или пакт за колективно самоубиство - рече Гутереш на COP27 во Шарм ел Шеик, Египет.

Во длабоко поделен свет, тој го повтори својот повик за „историски пакт меѓу развиените и економиите во развој, пакт на колективна солидарност“.

- Пактот за ставање крај на зависноста од фосилните горива и изградбата на електрани на јаглен, пакт за прифатлива и одржлива енергија за сите - рече Гутереш, пренесува „Би-Би-Си“.

Според него, „неприфатливо, скандалозно и самоуништувачко“ е што другите кризи, особено војната во Украина, ја ставија борбата за климата „во втор план“.

- Да не заборавиме дека војната против природата сама по себе е масовно кршење на човековите права - рече генералниот секретар на ОН.

Гутереш повика да се направи повеќе за да им се помогне на најранливите земји да се справат со „загубите и штетите“ што ги претрпеле од се посилните бури, поплавите, сушите и другите екстремни климатски настани.

- Емисиите на стакленички гасови продолжуваат да растат, глобалните температури продолжуваат да растат, а нашата планета брзо се приближува до точката на вртење што ќе го направи климатскиот хаос неповратен. Ние сме на автопат до климатскиот пекол со ногата сè уште на педалот за гас - предупреди Гутереш.

Тој додава дека војната во Украина и другите конфликти имале „драматично влијание“ низ целиот свет, но „не можеме да прифатиме дека нашето внимание не е фокусирано на климатските промени“.