Јужниот сосед предложи план во пет точки за примирје во Израел. 

Грчкиот министер за надворешни работи Јоргос Герапетритис на состанокот на министрите за надворешни работи на ЕУ и на Советот за соработка на арапските земји во Персискиот Залив објави план од пет точки за справување со кризата на Блискиот Исток, пренесува националната грчка телевизија ЕРТ.

„Ова е напад (на Хамас против Израел) што ги прекршува сите правила на меѓународното право и бара итна и активна интервенција на меѓународниот правен поредок“, рече Герапетритис во изјавата по настанот.

Министерот кажа дека лично се сретнал со претставници на сите земји од Персискиот Залив и одржал долги телефонски разговори со министрите за надворешни работи на Египет и Јордан. Вели дека Грција предложила план од пет точки за „намалување на тензиите и прекинување на магичниот круг на насилство“.

„Повикавме на итен прекин на непријателствата, особено против цивилното население, за итно враќање на сите киднапирани и заложници, за итно отворање на хуманитарните канали за да се осигури дека сите имаат пристап до здравствените услуги и за едногласна осуда на сите форми на тероризам од страна на Европската Унија и земјите од Персискиот Залив“, објасни шефот на грчката дипломатија.

Францускиот претседател Емануел Макрон изјави дека е веројатно оти Хамас имал помош во операцијата против Израел, истовремено нагласувајќи дека нема формален доказ за директна иранска вмешаност.