Земјите-членки на Европската унија одлучија да ја одложат конечната одлука за воведување забрана за продажба на нови возила со мотори со внатрешно согорување по 2035 година, соопшти шведското претседателство со ЕУ.

Конечната одлука треба да ја донесе состанокот на министрите за заштита на животната средина на 7 март, а сега замениците на постојаните претставништва на земјите членки одлучија да го одложат за подоцна состанок на Советот на ЕУ, најави портпаролот на шведското претседателство на Советот, Даниел Холмберг, без да ги наведе причините за располагање.

Преговарачите на Советот на ЕУ, кој ги претставува земјите-членки и Европскиот парламент, на крајот на октомври минатата година постигнаа начелен договор за регулатива со која се предвидува задолжително спроведување на стапката на нулта емисија на нови автомобили и комбиња од 2035 година, што значи дека оттогаш повеќе не може да се продаваат нови автомобили, на бензин и дизел.

Потоа, договорот беше потврден од Европскиот парламент на пленарната седница на 14 февруари, а за стапување на сила на регулативата остана конечната одлука на Советот на ЕУ.

Сепак, неодамна почнаа да се слушаат критики, особено во Германија и Италија, две земји-членки со многу силни автомобилски индустрии, дека определениот рок е премногу амбициозен и предвремен.

Заедно со Италија и Германија, резерви за оваа регулатива имаат и Полска и Бугарија. Доколку Германија се воздржеше, а Италија се спротиставеше, немаше да има доволно гласови во Советот за квалификувано мнозинство. Одлука во Советот може да се донесе доколку за неа гласаат најмалку 15 од 27 земји-членки, кои имаат најмалку 65 отсто од населението на ЕУ.

Убедливо мнозинство немаше ниту во Европскиот парламент. За одлуката гласаа 340 пратеници, против беа 279, а воздржани 21 пратеник. Регулативата ја поддржаа пратениците на социјалдемократите, зелените и либералите.