ГО ПРЕДИЗВИКАА ТРАМП: Палестинците бараат суверена и независна држава
Палестинците предадоа контрапредлог на Трамповиот мировен план.
Тие објавија дека предале контрапредлог на американскиот план за Блискиот Исток и ги повикаа Европејците да го притиснат Израел од анексијата на окупираниот Западен брег.
Премиерот на Израел, Бенјамин Нетанјаху го одреди 1 јули како датум кога ќе почне спроведувањето на анексијата на израелските населби и долината на Јордан на Западниот брег.
„Го предадовме контрапредлогот на Квартетот (Европската Унија, Обединетите нации, Русија и Соединетите Американски Држави) пред неколку дена“, изјави палестинскиот премиер Мохамед Штајех, јавува Франс прес.
Предлогот предвидува создавање „суверена, независна и демилитаризирана палестинска држава“.
Текстот предлага „помали измени на граничните линии таму каде што е потребно“, кажа тој на средбата со новинарите во Рамала, седиштето на палестинската власт.
Размената на териториите ќе се изврши според принципот на рамноправност во смисла на „големината и вредноста“, кажа палестинскиот премиер.
За една деценија, населението во стотината израелски населби на Западниот брег порасна за 50 отсто и надмина 450.000 жители.
На оваа територија живеат и над 2,7 милиони Палестинци.
Палестинците бараат независна држава во областа на Западниот брег со источен Ерусалим како главен град и во Појасот Газа, областите кои Израел ги освои во Шестдневната војна во 1967 година.
Слично
Поврзани вести
