Тие се независни и подлежат на челична дисциплина, изјави командантот на руската паравоена група „Вагнер“, пофалувајќи го успехот на неговите војници во инвазијата на Украина, кои се своевиден ривал на тамошната руска армија. Во видеото објавено од неговата служба за односи со јавноста вчера вечерта, Евгениј Пригожин ги истакна карактеристиките што им овозможија на неговите луѓе да го заземат градот Соледар во источна Украина, иако украинските власти тврдат дека нивните единици сè уште ги држат своите позиции таму.

Овие луѓе се многу искусни „и ги извршуваат задачите на независен начин“, бидејќи имаат свои авиони, топови и оклопни возила, рече Пригожин, познат и како „готвачот на Путин“.

- Најважен е командниот систем, кој е брилијантно усовршен. Групата „Вагнер“ ги слуша сите, секој има право да го каже своето мислење – додаде тој.

„За две недели го освои Соледар“

Евгениј Пригожин ја коментираше тактиката на освојување на Соледар на социјалната мрежа ВКонтакте и го покажа војникот што го предводеше нападот.

- Овој човек овде беше командант во Соледар и го окупираше за две недели. Беа ангажирани непријателските единици, елиминирани беа оние кои одбија да се предадат. Сите тела на украинските војници ќе бидат испратени во нивната татковина - изјави Пригожин.

На веб-страницата на неговата компанија „Конкорд“ е објавено видео во кое основачот на групата „Вагнер“ ја објаснува тактиката на преземање на Соледар.

Како што рече, кога ќе се донесе одлука, „сите мисии се извршуваат, никој не може да се откаже. Тоа го овозможува најчеличната дисциплина“, рече Пригожин.

Тие коментари звучат како прикриена критика на руското воено раководство, на кое Пригожин веќе упати критики, обвинувајќи ги за недоволна координација и тврдејќи дека управуваат со операции далеку од теренот.

Во последните месеци, Пригожин постојано ги критикуваше командантите на руската армија, особено кога украинските војници успеваа во регионот Харков на исток и Херсон на југ на есен. Во петокот руската армија објави дека го зазеде Соледар, откако „Вагнер“ веќе тврдеше дека градот е во нивни раце.

Руското Министерство за одбрана ја пофали храброста на Вагнерците

Пригожин преку својот медиумски сервис изрази жалење за изјавите од Москва „поради постојаните обиди да ја украде победата од неговата група“.

По тие критики, руското Министерство за одбрана објави соопштение во кое ја пофали „храброста“ на војниците Вагнер во Соледар.

Групата, основана во 2014 година, регрутирала илјадници криминалци да се борат во Украина, нудејќи им во замена намалена казна. Доказ дека групата добила сила е фактот што 61-годишниот Пригожин конечно во септември признал дека е основач на „Вагнер“, откако со години негирал. Откако се разоткри, сега редовно известува од украинскиот фронт и е активен на социјалните мрежи.