Српскиот тенисер Новак Ѓоковиќ ја освои рекордната десетта титула на австралискиот грен слем турнир од исто толку одиграни финалиња, а сега на патот до трофејот го совлада грчкиот играч Стефанос Циципас - 3:0 (6:3, 7: 6, 7:6).

По освојувањето на последниот бод, Ѓоковиќ во солзи ја прослави победата со членовите на тимот и семејството.

Новак со победата во Австралија се израмни со шпанскиот тенисер Рафаел Надал со 22 грен слем титули во кариерата, додека српскиот тенисер убедливо го држи рекордот по број на пехари во Мелбурн.

Ѓоковиќ од понеделник и официјално повторно ќе биде најдобар играч на светот, кој ќе му се закани на Шпанецот Карлос Алкараз на првото место на АТП листата, додека Циципас ќе биде на третата позиција.

Овогодинешното издание на Австралија опен беше и едно од најдобрите во кариерата за Новак Ѓоковиќ, кој загуби само еден сет на патот до титулата.

Ова беше 13. меч меѓу Ѓоковиќ и Циципас во кариерата на двајцата тенисери и 11 победи на српскиот тенисер.

Ѓоковиќ нема пораз во Мелбурн од 2018 година, кога во четвртото коло беше поразен од јужнокорејскиот играч Хјеонг Чунг.

Српскиот тенисер има 28 последователни победи, со кои го престигна славниот Андре Агаси.

Победничката серија вклучува три последователни титули во 2019, 2020 и 2021 година пред да биде принуден да го пропушти минатогодишниот турнир поради проблеми со визата.

Австралиските власти по пристигнувањето во Мелбурн му одбија виза на Ѓоковиќ, кој не беше вакциниран против корона вирусот и го депортираа.

Во овој натпревар Ѓоковиќ направи брејк во четвртиот гем, што се покажа како доволна предност и српскиот тенисер го доби првиот сет добивајќи гемови на свој сервис (6:3).

Стефанос Циципас одигра многу подобро и поагресивно во вториот, додека Новак Ѓоковиќ во неколку наврати покажа нервоза во комуникацијата со тренерот Горан Иванишевиќ и публиката во Род Лејвер Арената.

Сепак, и покрај неколкуте подолги и понеизвесни гемови, и двајцата тенисери успеаја да ги добијат оние во кои сервираа, па сетот беше решен во тајбрејк.

Во тајбрејкот сликата беше сосема спротивна – од 11 поени, дури седум му припаднаа на тенисерот кој го примаше сервисот.

Подобро се снајде Новак, кој успеа да слави со 7:4 и да поведе со 2:0 во сетови.

Циципас не се предаде ниту на почетокот на третиот сет и го доби првиот гем на сервис на српскиот тенисер, но Ѓоковиќ во следниот одговори со иста мера за 1:1.

Продолжението од третиот сет потсетуваше на вториот - и двајцата добиваа гемови на свој сервис и сетот отиде во тајбрејк.

Таму немаше неизвесност бидејќи Србинот го отвори решавачкиот дел од сетот со пет освоени поени, Циципас се закани, му спаси две меч топки на Ѓоковиќ и заостана еден поен (5:6).

Но, тој не успеа да направи пробив и Новак Ѓоковиќ ја освои десеттата победа на Австралија Опен.