Германија планира да го укине задолжителното тестирање на коронавирус за патниците кои се враќаат од области со висок ризик и да ја префрли својата стратегија во болниците и домовите за стари лица, се согласија во понеделникот федералните министри за здравство.

Федералниот министер за здравство Јенс Спан и покраинските министри за здравство се согласија дека бесплатните тестови за патниците кои се враќаат од странство ќе бидат укинати кон средината на септември, откако ќе започне учебната година. Точниот датум сè уште не е познат, но мерките треба да стапат на сила или во средината на септември или на 1 октомври.

После тоа, стратегијата за тестирање во земјата треба да се фокусира повеќе на секторот за нега на стари лица и на болниците. Според новата политика, оние што се враќаат од подрачја со висок ризик ќе мора да се самоизолираат и можат да го напуштат карантинот ако покажат „негативен резултат на тестот не порано од пет дена по пристигнувањето“.

Германија има воспоставено пунктови на аеродромите, железничките и автобуските станици за да овозможи задолжително тестирање за луѓето кои се враќаат од области што се сметаат за многу ризични. Овие тестови се бесплатни и исто така достапни за оние кои се враќаат од области кои не се класифицирани како висок ризик.

Политиката беше добро прифатена, рече Спан. Канцеларката Ангела Меркел треба да разговара за измените со премиерите на покраините во виртуелна средба во четврток. Министрите исто така се согласија да формираат веб-страница за патниците што ќе се вратат да можат да ги регистрираат своите податоци, со оглед дека првичниот систем резултираше во „кутии со документи“, според критичарите.

Промената доаѓа во време кога сегашниот здравствен систем се приближува до својот лимит. Во моментов, се извршуваат 875 илјади тестови секоја недела, додека лабораториите во земјата можат да работат со 1,2 милиони тестови неделно.