Француското биро за истрага и анализа објави фотографии од црната кутија од авионот кој се урна вчера во Француските Алпи.

Во несреќата загинаа сите 150 патници и членови на екипажот, а претставниците се надеваат дека црната кутија, иако значајно е оштетена, ќе понуди увид во она што се случило на вчерашниот лет од Барселона за Дизелдорф, пишува Би-Би-Си.

Другата црна кутија, која ги складира податоците за летот, не е пронајдена.

Францускиот министер за внатрешни работи е уверен дека кутијата е употреблива иако е значајно оштетена.

Потрагата за телата на настраданите е продолжена до зори, но спасувачите тешко доаѓаат до непристапниот терен.

Компанијата „Џерманвингс“ објави список со националностите на жртвите од вчерашната трагедија а босанските медиуми објавија дека меѓу настраданите во авионската несреќа имало и брачен пар со потекло од БиХ.

Леталото дури 18 минути ја губело висината пред ударот во планината, а од пилотите тогаш не стигнал ниеден повик на помош, покажува истрагата.

Француските власти објавија дека комуникацијата со пилотот е прекината во 10.30 кога авионот бил над Медитеранот, после што почнало заедга необично понирање.

„Ербас А320“ на летот 4U 9525 се урнал во 10.48 , откако висината на летање опаѓала секоја минута за околу 600 метри. Терористичкиот напад сепак не е веројатен тврдат официјални лица.

Конечната причина за падот на авионот би можела да се знае за неколку месеци, но уште сега постојат неколку теории за можните причини на падот.