Јапонските спасувачи пронајдоа 30 мртви планинари на врвот Онтака висок 3.067 метри, каде вчера проработе вулкан. Планинарите биле пронајдени без никакви знаци на живот -  не дишат и нивното срце не работи, но Јапонија официјално не објавува смрт на некое лице додека тоа не го потврдат лекарите. Официјалниот преглед е во тек. Во спасувачката акција веднаш по ненадејната ерупција на вулканот учествувале околу 550 војници, полицајци и пожарникари. Вулканот Онтака е оддалечен околу 210 километри западно од Токио. Вчера тој ненадејно проработе, исфрлајќи огромно количество пепел и камења, а на падините на планината останаа заробени околу 300 туристи и планинари, меѓу кои и деца. Густа обвивка од пепел, дебела цели 20 сантиметри, ја покри планината, принудувајќи ги затечените граѓани да бараат засолништа. Повеќето успеаја да се вратат, а 45 ноќта ја поминаа на планината. Онтака е популарна планинарска и излетничка дестинација. Јапонската метеоролошка агенција јавува дека вулканот и денеска останува активен.