Руското министерство за одбрана објави интерактивна 3D тура за новата воена база наречена „Арктичка детелина“. 

Тоа е најсеверната инсталација на руските вооружени сили.

„Со помош на оваа апликација, посетителите на интернет страницата на министерството за одбрана ќе можат интерактивно да го проценат практичниот и ергономскиот распоред во базата, кој на руските војници му овозможува извршување на задачи и во најтешките климатски услови на Арктикот“- информираат од руското Министерство за одбрана.

Со оглед на тоа што поголемиот дел од базата е таен, сега сите можат да погледнат како изгледа внатрешноста на „Арткичка детелина“ која, кога е целосно опремена, може да функционира независно дури 18 месеци. Виртуелната тура покажува како се опремени собите на војниците, а посетителите можат да ѕирнат и во кантината, теретаната и киното.

Овој комплекс е со површина од 14.000 метри квадратни и е обоен во црвена, бела и сина боја - боите на знамето на Русија. 

Базата „Арктичка детелина“ е поставена со цел да се обезбеди постојано присуство на Русија во регионот и во неа ќе бидат сместени околу 150 лица кои ќе бидат задолжени за заштита на руските граници, воздушниот простор и другите интереси во регионот.

Распоредот им овозможува на војниците движење од една зграда во друга, без да треба да излегуваат на ниските температури кои понекогаш се спуштаат и под -50 степени.