Глобалните цени на храната нема дополнително да се намалат, откако во септември тие се намалија на најниското ниво во последните три години, проценува Светската организација за храна и земјоделство (ФАО). На падот на цените, кој беше забележан минатиот месец, влијаеше остриот пад на цената на житото, додека цените на млечните производи, месото и шеќерот се зголемија, соопшти ФАО. Индексот ФАО, кој го покажува месечното движење на светските цени на основните прехрамбени производи, во септември изнесуваше 199,1 поени, што е за речиси еден процент помалку од 201,4 поени кои беа забележани во август. Тој индекс во изминатите пет месеци бележеше пад, а во септември го достигна најниско ниво од септември 2010 година.