Европските лидери ќе почнат разговор за прекинување на преговорите со Турција за пристап во Европската Унија, вели австрискиот канцелар, Кристијан Керн.

ЕУ е загрижена поради ударот на пучистите по неуспешниот обид за државен удар во Турција и најавите на претседателот Реџеп Таип Ердоган за воведување на смртна казна, што за Брисел е неприфатливо.

Керн во интервју за австриската радиотелевизија кажа дека демократските стандарди во Турција не се доволни за да го оправдаат нејзиниот влез во Унијата, а подеднакво важно е и економското прашање, бидејќи турската економија е под европскиот просек.

На прашањето дали Австрија на состанокот на Европскиот парламент следниот месец, ќе предложи прекин на преговорите со Турција, Керн рече дека за тоа ќе започне разговор и ќе се бара алтернативен концепт.

На оваа тема се погласно се зборува во јавноста. По најновите случувања Турција се оддалечува од ЕУ.