Педесетина најголеми компании од Европа се силно присутни во даночните оази, при што секоја во просек има 117 „офшор“ филијали, се наведува во анкетата објавена од невладината организација ЦЦФД-Тере солидаире и магазинот „Проџект“.

Предводник на борбата против затајувањето данок е Католичкиот комитет против глад и за развој. Во својот извештајот наречен „Во рајот на загубениот данок“ организацијата изврши проверка на сметките и работењето на компаниите присутни на берзите. Меѓу компаниите што се најдоа на проверка се банките ХСБЦ, БНП Парибас и Дојче Банк, производителите на автомобили Пежо и Фолксваген, телекомуникациските гиганти Сименс и Водафон, како и нафтените компании Тотал и Енел.

Резултатите од извештајот се поразувачки. Постојат 4.858 филијали во даночните рајови, односно 29 проценти од подружниците што компаниите ги имаат во странство.

- Само на Кајманските Острови имаат повеќе филијали отколку во Бразил и двапати повеќе отколку во Индија. Во Луксембург речиси исто како и во Кина, наведува невладината организација.

Најчести дестинации што ги привлекуваат странските компании се Холандија, американската сојузна држава Делавер, Луксембург, Ирска и Кајманските Острови, се наведува во извештајот.

ЦЦФД-Тера солидаире и магазинот „Проџект“ ги повикуваат светските сили во Г-8, кои треба да се состанат во Северна Ирска и земјите од Г-20 да преземат мерки за сузбивање на ваквото работење, особено со воведување задолжителен „извештај“ на сите држави и за сите економски гранки.