Да се воведе функцијата европски јавен обвинител и да се зајакне Европското биро за борба против измами (ОЛАФ), со цел да се засили борбата против даночните измами. Ваков предлог денеска во Брисел презентираа претседателот на Европската комисија, Жозе Мануел Баросо и еврокомесарот за правда, Вивиен Рединг, јави дописникот на МИА. Целта на овој предлог на ЕК е подобрување на системот на гонење на криминалците кои ги измамиле даночните обврзници во ЕУ. - Оваа иницијатива ја потврдува посветеноста на Комисијата и заложбата за почитување на владеењето на правото, со решително зајакнување на заштитата на парите на даночните обврзници и ефективно справување со измамите кои ќе ги вклучуваат фондовите на ЕУ. Со овој предлог, ЕК ги исполнува своите ветувања за нулта толеранција кон измамите во однос на буџетот на Унијата - потенцира Баросо. Според Рединг, пак, ако ЕК сама не го заштити федералниот буџет, тоа нема да го направи никој друг за Унијата, па затоа го повика Европскиот парламент и земјите-членки на Унијата да застанат зад овој проект, со цел јавниот обвинител на ЕУ да почне да функционира од 1 јануари 2015 година.