Израелскиот премиер Бенјамин Нетанјаху ја нарече „скандалозна“ одлуката на главниот обвинител на Меѓународниот кривичен суд (МКС) Карим Кан да побара налог за апсење за него и министерот за одбрана Јоав Галант, пренесуваат израелските медиуми.

„Ова нема да ме спречи, ниту ќе не спречи“, наводно рекол Нетанјаху на состанокот на неговата партија Ликуд, според израелскиот портал Ynet.

Главниот обвинител на МКС, Карим Кан, рече дека Нетанјаху и Галант се обвинети за „поттикнување истребување, поттикнување глад како метод на војна, вклучително и задржување на хуманитарна помош и намерно таргетирање на цивили во конфликтот“.

Лидерите на Хамас, Јахја Синвар, Мохамед Деиф и Исмаил Ханије се обвинети за истребување, убиства, земање заложници, силување и сексуален напад, пренесува Танјуг.