Министрите за енергетика на земјите-членки на ЕУ ќе се состанат денеска во Брисел, а една од главните теми ќе биде судбината на гасоводот Јужен тек, за кој Русија најави намера да ја прекине изградбата. Предвидено е министрите за Јужен тек да разговараат за време на работниот ручек, а планиран е и одвоен состанок на потпретседателот на Европската комисија задолжен за енергетската унија Мартин Шефчович со инистрите од земјите кои се директно или индиректно вклучени во овој проект. Брисел се обидува да испрати порака дека не е против изградбата на Јужен тек под услов гасоводот да се усогласи со европските правила од т.н. Трет енергетски пакет, кои забрануваат иста фирма да биде и сопственик на гасоводот и единствен дистрибутер на гасот. Од друга страна, Москва тврди дека повикувањето на овие прописи е само изговор за ЕУ од политички причини, во услови на крајно заладени односи со Русија, да ја попречи изградбата на овој енергетски проект вреден 50 милијарди евра. По денешниот состанок, Шефчович на средба во Софија треба да му го пренесе усогласениот став на ЕУ на рускиот министер за енергетика Александар Новак.