ЕУ денес објави дека и ги дала на Турција целосните 6 милијарди евра што Анкара ги бараше веќе одамна во замена за домаќинството на сириските бегалци, пренесе АФП.

Во најголемата бегалска криза од Втората светска војна во 2015 година, милиони луѓе пристигнаа во Европа, а Брисел и Анкара се согласија во 2016 година да го решат проблемот. Според договорот, Турција вети дека ќе прифати мигранти кои се враќаат од Грција и ќе стори се да се запре протокот, во замена за 6 милијарди евра.

Претседателот Реџеп Таип Ердоган во меѓувреме ја обвини ЕУ дека не ги исполнила ветувањата, велејќи дека Анкара потроши 40 милијарди долари за над 3,6 милиони сириски бегалци кои живеат во Турција.

„Денес се финализира договорот од 6 милијарди евра за поддршка на ЕУ за бегалците и барателите на азил во Турција“, рече Николаус Мејер-Ландрут, амбасадор на ЕУ во Анкара.

Парите на ЕУ се наменети за специфични социјални проекти во Турција за помош на бегалците и нема да бидат уплатени директно на турската влада.

Прашањето значително ги влоши односите меѓу ЕУ и Турција. На почетокот на оваа година, Ердоган рече дека Турција нема да ги спречи мигрантите да ја напуштат територијата и да се упатат кон ЕУ, но подоцна ја повлече заканата. Тој се обиде да изврши притисок врз Брисел за поголема поддршка на Турција во поглед на сирискиот конфликт, особено по избувнувањето на насилството во северозападниот регион Идлиб.

Новите договори вклучуваат поддршка за здравствени услуги за мигрантите и подобрување на условите за живот на најранливите бегалци.

Тие избегаа во Турција по избувнувањето на конфликтот по антивладините протести во Сирија во 2011 година, при што загинаа скоро 400.000.

Тензиите меѓу ЕУ и Турција се големи како резултат на енергетските истражувања на Анкара на истокот на Средоземното море во водите што ги тврди Грција како свои. Унијата по самитот на Европскиот совет минатата недела рече дека планира санкции против Турција. Но, Брисел сепак соопшти дека е „подготвен да продолжи со обезбедување финансиска помош на сириските бегалци и азиланти во Турција“.