Според новите правила, изгласани денеска од Европскиот парламент (ЕП), пакет патувања, кои се состојат од хотел, лет - или изнајмување на автомобил, закажани преку интернет како пакет или преку поврзани веб-сајтови ќе ја уживаат истата заштита како оние купени во туристичка агенција. Патниците ќе имаат повеќе права за откажување на резервацијата и првичните информации во врска со кој е одговорен, ако нешто тргне наопаку, соопштија од ЕП.

„Поради промените во туристичкиот пазар и растечкиот тренд на онлајн резервации на патувања, постои итна потреба од модернизација и адаптација на старата директива, која е од 1990 година“, изјавил известувачот Биргит Колин-Ланг од ЕП, Германија.

„Со новото законодавство правата на патниците во Европа беа комплетно засилени. Новите модели за резервација се целосно покриени од својот делокруг, а патниците добиваат сеопфатни информации за своите права. Ние успеавме исто така да ги земеме предвид економските интереси на индустријата: оператори, туристички агенции и хотели“, додала таа.

Заштита за повеќе патници и појасни права

Правилата за пакет туристички патувања ќе покриваат два вида договори: туристичките пакети кои можат да се претходно наместени од страна на организаторот или изменувани од страна на клиентот, и новиот начин на зачувување на патувања, наречен „поврзани патнички услуги“.

Парламентот гарантира дека таквите комбинирани трансакции кај кои името, информациите за плаќање и e-mail адресата на патникот се разгледуваат помеѓу трговците и има склучување на втор договор во рок од 24 часа по првичната резервација, кои ќе се сметаат за пакет туристичка зделка.

Според текстот пред клиентот да склучи каков и да е договор организаторот и трговецот треба експлицитно да му објаснат дека купува туристички пакет и да го информираат за своите права и кој е одговорен, ако нешто тргне наопаку. Парламентот ја додаде обврската за организаторите да им обезбедат на туристите приближен час на заминување и враќање и индикација за секакви можни дополнителни трошоци.

Тој исто така го додаде правото на патниците да поништат пакет договор и да ги добијат парите назад, ако цената на пакетот се покачи за повеќе од 8% (Комисијата понудила 10%) или поради непредвидливи околности како природна катастрофа или терористички напад во дестинација.

Со гласањето во парламентот законодавната постапка завршува. Сега земјите членки имаат 2 години, за да ги транспонираат новите правила во своето национално законодавство и дополнителни шест месеци за да ги стават во примена.