Полицијата во Кабул соопшти дека најмалку 19 лица загинале, а неколку други се повредени во експлозија во едукативен центар во главниот град на Авганистан.

Експлозијата се случи во образовниот центар Каај во областа Даште Барчи на запад од градот.

Студентите полагаа универзитетски испит, соопштија надлежните од центарот.

Многу од оние што живеат во областа се припадници на малцинството Хазари, кое беше цел на претходни напади.

Сѐ уште никој не ја презел одговорноста за експлозијата.

Портпаролот на Министерството за внатрешни работи на Талибанците изјави дека безбедносните екипи се на местото на настанот и го осудуваат нападот.

Абдул Нафи Такор рече дека нападот врз цивилни цели „ја докажува нечовечката суровост на непријателот и недостатокот на морални стандарди“.

Талибанците се вратија на власт во Авганистан минатиот август и групата вели дека се обидува да ја врати стабилноста.

Сепак, нападите на ривалските исламисти на групата Исламска држава продолжија.