Венецуела потпиша мултимилионски договор за продажба на 1.000 килограми полурафинирано злато („доре“) на трговската компанија Трафигура за американскиот пазар, а испораката ќе ја обезбеди државната рударска компанија Минервен.

Според извори запознаени со договорот, Минервен ќе испорача помеѓу 650 и 1.000 килограми злато на Трафигура.

Трафигура ќе го транспортира златото до рафинериите во Соединетите Американски Држави, врз основа на посебен договор со американската влада, објави Аксиос, повикувајќи се на анонимни информирани извори.

Согласот го потпиша и американскиот секретар за внатрешни работи Даг Бургум, кој отпатува во Венецуела за да помогне во финализирањето на договорот, според Ројтерс.

Вредноста на договорот зависи од конечната количина на испорачано злато и пазарната цена, но според проценките на медиумите, таа би можела да надмине 100 милиони долари ако се испорача максимална количина од еден тон.

Trafigura, Venezuelan mining firm sign deal for up to 1,000 kg of gold, Axios reports https://t.co/klqxh3XqUp https://t.co/klqxh3XqUp

— Reuters (@Reuters) March 5, 2026

Договорот доаѓа во време кога властите во Каракас се обидуваат да го оживеат рударскиот сектор и да привлечат странски партнери, додека Вашингтон истовремено истражува можности за соработка во областа на минералите и енергетските ресурси.

Венецуелската нафтена компанија PDVSA пред два дена објави дека потпишала договори за снабдување со нафта и нафтени производи со трговски компании кои ги пласираат овие производи на пазарот на Соединетите Американски Држави, објавија медиумите.