Светската здравствена организација потврди нова епидемија на ебола во североисточната провинција Итури во Демократска Република Конго, каде лабораториски се потврдени 13 случаи на болеста. Потврдата доаѓа по анализи спроведени во Националниот институт за биомедицински истражувања во Киншаса.

Според СЗО, првиот сигнал за сомнителни случаи бил добиен на 5 мај, по што тимови биле испратени во Итури за поддршка на локалните здравствени власти. Првичните примероци земени на терен биле негативни, но подоцнежните анализи во Киншаса потврдиле присуство на вирусот ебола.

Епидемијата е поврзана со кластер на тешки заболувања и смртни случаи во здравствените зони Монгбвалу и Рвампара. СЗО соопшти дека епидемијата е предизвикана од видот Bundibugyo, кој првпат бил идентификуван во 2007 година во западна Уганда.

Според Африканскиот центар за контрола и превенција на болести, во областа се регистрирани околу 246 сомнителни случаи и 65 смртни случаи, од кои четири се меѓу лабораториски потврдените случаи. Најголем дел од заболените и починатите се пријавени во Монгбвалу и Рвампара, а сомнителни случаи има и во Бунија.

Ова е 17-та регистрирана епидемија на ебола во ДР Конго од 1976 година, кога вирусот првпат беше идентификуван. Генералниот директор на СЗО, Тедрос Аданом Гебрејесус, изјави дека земјата има силно искуство во справување со ебола и дека СЗО ќе обезбеди целосна поддршка.

A growing Ebola outbreak in Congo has now spread to Uganda, with at least 65 people dead and hundreds of suspected cases reported. Health experts warn the situation is especially dangerous because the strain involved has no approved vaccine or treatment. pic.twitter.com/hyVwc7NsZT

— CBS Evening News with Tony Dokoupil (@CBSEveningNews) May 15, 2026

СЗО веќе ја засилува поддршката за конгоанските власти, испраќа експерти и медицински материјали и ослободува итна финансиска помош од 500.000 долари за одговор на епидемијата.

Здравствените власти во регионот се во состојба на зголемена готовност, особено поради близината до границите со Уганда и Јужен Судан. Уганда потврди смртен случај од ебола поврзан со увезена инфекција од ДР Конго, но засега не се пријавени локални инфекции во земјата.

Еболата се пренесува преку контакт со телесни течности на заразено лице, како крв, повраќаница или други секрети, но и преку контаминирани површини или контакт со заразени животни. Болеста е ретка, но тешка и често смртоносна, со симптоми што може да почнат со треска, слабост, болки во мускулите, главоболка и воспалено грло, а подоцна да преминат во повраќање, дијареја и крвавења.