Фудбалот ќе мора да попушти пред паниката од ебола. Африканскиот куп на нации мора да бара нов домаќин откако Мароко се исплаши од опасниот вирус и организацијата на најголемото африканско фудбалско натпреварување. Мароко се обратил до Конфедерацијата, со барање Купот да се одложи, но ваквото барање е одбиено, а повик за организација бил испратен до Гана и Јужноафриканската Република. За нив се верува дека ја имаат потребната инфраструктура да го организираат турнирот во толку краток рок. Ако повикот го прифатат и двете земји, ќе се одржи ждребување за избор на домаќинот. „Нашата загриженост е здравјето во Африка. Проблемот е во тоа што Мароко требаше да биде домаќин на меѓу 200 и 400 илјади навивачи, а ниту една африканска земја нема можности медицински да надгледува толку голем број луѓе“, вели мароканскиот министер за спорт Мохамед Узин. Од ебола веќе починаа околу 4.500 луѓе и тоа најголем дел во земјите од западна Африка.