Британскиот премиер Борис Џонсон изјави дека Западот не треба да ја охрабрува Украина да се согласи на „лош“ компромис со Русија, нарекувајќи го „морално одвратно“.

- Поттикнување на лош мир во Украина значи да се охрабри рускиот претседател Владимир Путин и сите оние во светот кои мислат дека агресијата се исплати - рече Џонсон во говорот во Блекпул, северозападна Англија. 

Дополни дека „тоа би било грешка и би ја отворило вратата за повеќе конфликти, повеќе нестабилност, поголема несигурност во светот и повеќе економски тешкотии“.

- Знам дека некои, не во оваа земја, туку на други места, веруваат дека цената на поддршката за Украинците сега е превисока и дека треба да се охрабрат да се согласат со она што го бара Путин. Да се напуштат Украинците би било морално одвратно - рече тој.

Путин „никогаш нема да може да ја потчини Украина и колку побрзо го сфати тоа, толку подобро, но не смее да му се дозволи да постигне делумен успех со голтање дел од земјата како што правеше претходно и прогласување прекин на огнот“.