Руската област Курск планира да воспостави трета одбранбена линија во близина на границата со Украина, објави денеска регионалниот гувернер Роман Старовојт. Како што појасни, на овој начин во соработка со руското Министерство за одбрана сакаат да спречат странски сили да навлезат на нивната територија. Гувернерот на соседен Белгород најави и изградба на одбранбени утврдувања. Според Старовојт, новата одбранбена линија ќе биде завршена на 5 ноември.

Вјачеслав Гладков, гувернерот на Белгородската област, која досега беше најмногу мета на украински прекугранични напади, приложи фотографии на својата онлајн објава за почетокот на работата на границата, каде што бетонските бариери се во форма на пирамиди кои се гледаат на патот, пренесува француската новинска агенција АФП.

Според локалните власти, двајца цивили биле убиени во нападите на Белгород во саботата. Според Гладко, речиси 15.000 луѓе останале без струја за време на украинското гранатирање на цивилната инфраструктура во рускиот град Шебекино. Белгород се граничи со украинските региони Суми, Харков и Луганск, од кои последните се редовни места на конфликт од почетокот на војната.