Венецуелскиот претседател Николас Мадуро упати апел на англиски јазик, до американскиот претседател Доналд Трамп. Пораката е испратена во моменти кога растат тензиите меѓу Вашингтон и Каракас.

„Без луда војна, те молам“ - кажа Мадуро. 

Коментарите на Мадуро дојдоа откако американскиот претседател Доналд Трамп изјави дека одобрил тајна акција против јужноамериканската земја, во услови на ескалација на американската воена кампања против наводните трговци со дрога во Карибите и Пацификот.

„Да, мир, да, мир засекогаш, мир засекогаш. Без луда војна, те молам!“, рече Мадуро на состанокот со синдикатите поврзани со левичарскиот лидер, поранешен возач на автобус и синдикален лидер.

САД распоредија невидливи борбени авиони и воени бродови како дел од она што го нарекуваат борба против наркотици, но сè уште не објавија докази дека нивните цели - осум бродови и полуподморница - шверцувале дрога.

Во американските напади, кои започнаа на 2 септември, загинаа најмалку 37 лица, според пресметката на АФП врз основа на американски извори. Регионалните тензии се разгореа како резултат на кампањата, а Мадуро го обвинува Вашингтон дека бара промена на режимот.

Минатата недела, Трамп изјави дека одобрил тајна операција на ЦИА против Венецуела и дека размислува за напади врз наводни нарко-картели на копното.

Американскиот претседател го обвини Мадуро дека раководи со нарко-картел, обвинение што венецуелскиот лидер го негира.

Фото: Принтскрин/Икс