Поротата во Мисури му нареди на Баер да плати 1,56 милијарди долари на четворица тужители кои тврдат дека хербицидот Roundup предизвикал повреди, вклучително и рак, пресуда што може да го зголеми притисокот на инвеститорите врз компанијата да ја промени својата правна стратегија.

Поротата во округот Кол, Мисури во петокот го прогласи Монсанто на Баер за виновен за небрежност, дефекти во производството и не предупредување за потенцијалните опасности од употребата на хербицидот Roundup, според судските документи.

Валори Гунтер од Њујорк, Џими Дрејгер од Мисури и Даниел Андерсон од Калифорнија добија комбинирана отштета од 61,1 милиони долари и по 500 милиони долари казнена отштета. На сите им бил дијагностициран не-Хочкинов лимфом за кој тврдат дека бил предизвикан од употребата на Roundup на семејната фарма.

Баер, германска компанија за лекови и земјоделски хемикалии, вели дека децениските истражувања покажале дека Roundup и неговата активна состојка, глифосат, се безбедни за човечка употреба.

Пресудата е четврта во низата судски загуби за Баер. Претходно овој месец, Унион Инвестмент, еден од десетте најголеми акционери на Баер, ја повика компанијата да ја преиспита својата правна стратегија и да се вклучи повеќе во постигнувањето на спогодби.

ЕУ ја прошири употребата на глифосат

Барт Ранкин од адвокатската фирма Форест Велдон, кој ги застапуваше тужителите во случајот, рече дека оваа победа е прва од многуте во име на илјадници тужители. Баер во соопштението рече дека има силни аргументи да ги оспори неодамнешните пресуди по жалба.

Европската комисија во четвртокот ја продолжи лиценцата за употреба на глифосат, најкористениот хербицид во светот, за десет години, откако земјите-членки не изразија јасен став за одобрување на глифосат.

Против компанијата се поднесени околу 165.000 тужби за лични повреди наводно предизвикани од Roundup. Баер го купи хербицидот кога ја купи агрохемиската компанија Монсанто за 63 милијарди долари во 2018 година.

Во 2020 година, Баер ги исплати повеќето од тогашните нерешени случаи поврзани со Монсанто, до 10,9 милијарди долари. Се уште се чекаат околу 50.000 барања.

Фото. ЕПА