Странските дипломати му должат на градот Њујорк повеќе од 16 милиони американски долари за неплатен паркинг за дипломатските возила, покажаа податоците на њујоршките градски служби во деновите кога овој град е седиште на светската дипломатија. Одделението за финансии на Њујорк наведува дека на врвот на листата е Египет со долг за паркирање од речиси два милиони долари. Повеќе од 500.000 долари должат Нигерија, Индонезија, Бразил, Мароко и Пакистан. Поголемиот дел од тој долг потекнува од казни за паркирање издадени пред 2002 година, а од тогаш значително е намалено неплаќањето на паркинг-услугите, бидејќи градските власти започнаа остра кампања за сузбивање на оваа појава. Портпаролот на египетската мисија во Обединетите нации вели дека не знае детали за овој огромен долг, а не сакале да коментираат ниту другите земји кои се наоѓаат на врвот на листата на должници.