Високиот адмирал на НАТО вчера упати порака до бизнисмените да подготват „воено сценарио“ и да го прилагодат своето производство и дистрибуција за да бидат помалку изложени на уцени од Русија и Кина.

„Ако можеме да ги обезбедиме сите производи и услуги, тоа е клучен дел од нашето одвраќање“, рече во Брисел шефот на воениот комитет на НАТО, холандскиот адмирал Роб Бауер.

Говорејќи на конференцијата на Центарот за европска политика, тинк-тенк, тој рече дека одвраќањето вклучува повеќе од само воени способности, бидејќи сите достапни инструменти се користат во војна.

„Сведоци сме на се повеќе саботажи и Европа веќе го доживеа тоа во снабдувањето со енергија“, рече Бауер.

„Мислевме дека имаме договор со Гаспром, но всушност имавме договор со господинот Путин. Истото важи и за кинеската инфраструктура и производи. Ние всушност имавме договор со г-дин Си“, додаде тој.

Бауер предупреди на зависноста на Западот од Кина, која произведува 60 отсто од ретки метали и преработува 90 отсто од нив. Од Кина пристигнуваат и хемиски состојки за седативи, антибиотици, антиинфламаторни и лекови за висок крвен притисок.

„Ние сме наивни ако мислиме дека Комунистичката партија нема да ја искористи оваа моќ. Деловните луѓе од Европа и Америка мора да разберат дека деловните одлуки што ги носат имаат стратешки последици за нивните земји“, истакна Бауер.

„Бизнисмените треба да подготват воено сценарио и да го прилагодат своето производство и дистрибуција на него “.