Поранешниот полицаец Михаил Попков (58), познат и како „сибирскиот врколак“ и „манијакот од Ангарск“ кој уби најмалку 83 жени, сака да се приклучи на контроверзната руска шема за испраќање затвореници на фронтот во замена за нивната слобода.

„Дејли мејл“ наведува дека на овој начин илјадници силувачи, убијци и други закоравени криминалци станале руски платеници.

На оние кои ќе се согласат да се борат и да останат живи шест месеци, рускиот претседател Владимир Путин им вети помилување. Ева Меркачева, член на Рускиот совет за човекови права, неодамна изјави дека Путин тајно помилувал десетици осуденици уште пред да бидат испратени да се борат во војната во Украина, пренесува Блиц.

Убил 83 жени

Попков убил 83 жени и отслужува две доживотни затворски казни плус 10 години по три одделни судења, но полициски извор верува дека вистинската бројка е „поблиску до 200“, пишува британскиот таблоид. Попков ги силувал повеќето од своите жртви, на возраст меѓу 18 и 50 години, пред да ги убие со секири, чекани, ножеви, шрафцигери, безбол палки или лопати.

И покрај тоа, руските власти дозволија државната телевизија да го интервјуира во затвор бидејќи тој апелираше да им се придружи на руските борци, тврдејќи дека имал искуство во радио електроника од неговото време како регрут на Црвената армија. Тој се надева дека ќе може да ја искористи шемата на Кремљ, во која се ослободени дури 40.000 осуденици, за повторно да се најде на слобода.

Попков сега дури и одеднаш признава повеќекратни убиства додека се обидува да добие место меѓу платениците на руската група Вагнер предводена од контроверзниот бизнисмен Евгениј Пригожин.

- Кој е твојот сон? – го праша Попков новинар на руската државна телевизија.

- Да одам во војска - одговори тој.

- Дали тоа го сакаш?

- Ако едноставно кажам дека тоа е она што го сакам, тоа не би било многу искрено. На крајот на краиштата, оваа (војна) не е видео игра или измислена книга за некои супер херои. Да кажам искрено и објективно, да се чека во текот на јануари и февруари во најстудениот период. За мене мразот е најлош - рече Попков.

Кога малку ќе се загрее, тој не се двоумеше да се вклучи во војната.

- Тогаш би се согласил без размислување. Влегување во ладен ров од топла соба - колку долго човек ќе преживее? - рече тој.

-Едно е да се сомневаш или не, тоа е половина од битката, но може и никој да не ми го понуди.

- Дури и да ја земам предвид мојата воена специјализација, мислам дека моментално е многу барана. И покрај тоа што деновиве се е помодерно, радио електрониката и сето тоа, иако бев десет години во затвор, мислам дека нема да биде повторно толку тешко да се научат (новите вештини) - истакна тој.

Терор врз жените

Попков, оженет татко на едно дете,  од 1992-2010 година вршел терор врз жените во родниот Ангарск, кој сакал да го „исчисти од проститутки“. Тој изјави дека за убиствата се водел од „внатрешни убедувања“. Тој лажно ја обвини сопругата за неверство и тврдеше дека неговата бруталност е резултат на ова измислено предавство.

Тој ги таргетирал жените кои правеле работи кои ги сметал за неморални, како на пример одење на забава без машка придружба. Неговата вообичаена тактика била да излезе навечер во полициска униформа, да најде потенцијална жртва и да и понуди возење со неговото полициско возило. Но, потоа ќе ги однесе на оддалечени локации, каде што ќе ги силува и убива. Толку многу им ги осакатил телата што во руските медиуми ги добил прекарите „врколак“ и „манијак од Ангарск“.

Психијатарот од Ангарска, Александар Гришин, рече дека за неговото однесување веројатно придонела мајката алкохоличар која исто така го злоупотребувала.  На Попков му била дијагностицирана „убиствена манија“, состојба кога личноста има ирационална желба да убие некого, пренесе ТАСС. И покрај тоа, тој беше прогласен за нормален.

- Имаше моменти кога мислев дека смртната казна е подобра (од доживотен затвор) - рече Попков, кој за време на пандемијата правеше заштитни маски за лице во затвор.

Изрази жалење за убиствата

Мораториум на смртната казна во Русија е во сила од 1996 година. Пред тоа, осудениците биле убивани од џелатот со куршум во задниот дел од главата. Зборувајќи претходно од затворот во Иркутск, Попков изрази „жалење“ за убиствата.

- Имам многу за што да жалам. На пример, ништо од ова немаше да се случи ако не го направев ова. Природно е секој човек да се кае. Имав многу време да размислувам (за тоа) – рече тој.

Попков, поранешен полицаец кој ја напушти службата во 1998 година, беше уапсен во Владивосток во 2012 година, откако беше потврдена неговата вмешаност во 81 убиство и три обиди за убиство на жени.

Тој призна уште две убиства во 2020 година, со што бројот на жртви се искачи на 83, потсетува ТАСС. Бруталното убиство на две жени, за кое Попков доби трета казна, е извршено во 1995 година во Ангарск, а телото на една од жртвите не е пронајдено, според судските документи.

Името на 83. жртва не е објавено.

Застрашувачки снимки од семејна архива во 1990-тите го прикажуваат убиецот како оди кон камерата со нож и рецитира повоена детска рима базирана на нацистички воени затвореници кои ги напаѓаат локалните жители.

- Ќе те пресечам. ќе те истепам. Сега си ти на ред – низ насмевка вели Попков во видеото.