Најмалку три лица загинаа, а неколку други се ранети во престрелка во трговскиот центар Филдс во Копенхаген, соопшти данската полиција.

Тројца од ранетите се во критична состојба, а полицијата уапсила 22-годишен маж осомничен за нападот.

Сорен Томасен, началникот на полицијата, изјави дека мотивот за нападот е нејасен, но не исклучува тероризам.

Мете Фредериксен, премиерката на Данска, изјави дека земјата претрпела брутален напад.

Таа изрази сочувство до семејствата на жртвите и изјави дека сака да ги охрабри луѓето од Данска да застанат еден до друг и да се поддржуваат во тешки моменти за целата земја.

„Данска беше цел на брутален напад во неделата вечерта. Неколку луѓе загинаа, многумина беа ранети.

„Невини семејства беа цел на напади додека беа на шопинг или на ручек, вклучително и деца, адолесценти и возрасни“, рече Фредериксен.

Данското кралско семејство, исто така, изрази сочувство „до семејствата на жртвите и до сите погодени од трагедијата“.

„Сè уште не го знаеме целосниот обем на трагедијата, но веќе е јасно дека повеќе луѓе ги загубија животите и дека уште повеќе се повредени“, се вели во заедничката изјава на кралицата Маргрете, престолонаследникот Фредерик и принцезата Мери.

Осомничениот за нападот во трговскиот центар имал пушка и муниција кога бил уапсен, соопшти полицијата.

Осомничениот, опишан од полицијата како „етнички Данец“, ќе биде сослушан од судија во понеделник.

Полицијата соопшти дека нема индикации дека некој друг бил вклучен во нападот и ги повика сопствениците на продавниците да ги зачуваат сите снимки од видео надзор.

Очевидци опишаа како панично бегале додека се слушале истрели во трговскиот центар Филдс на југот на градот.

Еден од нив, Махди Ал-Вазни, за данската телевизија изјави дека напаѓачот имал „ловечка пушка“.

Филдс е најголемиот трговски центар во Данска, со повеќе од 140 продавници и ресторани.

Сите патишта кои водат до тој дел на данската престолнина и линијата на метрото што ја поврзува продавницата со центарот на градот се блокирани, а на терен се екипи на итната помош и пожарникари.

Емили Џепесен била сведок на инцидентот.

„Не знаев што се случува. Одеднаш насекаде настана хаос“, изјави таа за весникот Jylland Posten.

Очевидци зборуваа и за паника меѓу клиентите кога почнало пукањето.

Една од нив, Изабел, за данските медиуми изјави:

„Одеднаш слушнавме истрели. Мислам дека беа десет од нив. После тоа трчавме низ трговскиот центар и завршивме во тоалетот, 11-мина“.